譚輝智帶團初體驗遊桂林 入鄕隨俗著民族服唱山歌

啱啱過去嘅復活節假期， 譚輝智 寓工作於娛樂，首次帶團同一班粉絲坐高鐵遊桂林。呢次輝智除咗帶埋一對仔女同行之外，佢龐大嘅家族成員亦都參與其中。要帶住咁大棚人去旅行，輝智都話係一次好難得嘅體驗，而首次搭高鐵嘅輝智，仲話出發前興奮到失眠添呀！

輝智雖然係第一次帶團，但係呢位領隊真係相當稱職，唔單止親自巡視每一卡車廂，更同團友打卡留念，可以話係有求必應。

經過三小時嘅車程，輝智都有把握呢段路程好好補眠同醫肚，之後佢就帶住成班團友，浩浩盪盪到桂林熱門景點「象鼻山」，受到當地人熱情迎賓，輝智仲舞癮大發，同一班少數民族姑娘一齊跳舞，輝智仲自誇自己拿手跳民族舞。

唔知係咪玩得太忘形，輝智差啲連銀包都唔見埋，好彩最後失而復得，真係嚇到一額汗。心情靚返晒嘅輝智又繼續下一個行程，就係坐船遊湖喇，貪玩嘅佢仲搶埋船長嘅飯碗，話要揸船帶大家去澳門，認真鬼馬。

喺咁靚嘅景色下遊湖，輝智同主播 潘盈慧 仲換返件民族服，體驗一下獨特嘅民族文化啦，佢兩個仲跟當地嘅民族姑娘學跳民族舞同埋唱山歌，果然係入鄉隨俗。

遊完船河之後，輝智就去咗湖邊嘅餐廳high Tea，喺咁靚嘅美景下品嚐美味嘅水果，真係一大享受呀。

話咁快開始入夜，輝智轉到酒店同粉絲親友合照後，又大批人馬一齊去夜市買手信，輝智似乎好快就已經有收獲，仲用咗三吋不爛之舌成功講價帶走四把扇。之後佢繼續出招，又買咗兩個紀念磁貼，同埋一把檔主即場寫嘅才子扇。呢把扇仲用咗譚輝智嘅名嚟作詩，真係好有紀念價值架。