吳若希同老公肉緊啜爆8歲生日小公主 餅印囡囡遺傳媽咪基因獲封小美人

吳若希Jinny 同圈外老公Alex 婚後生咗一對可愛子女，話咁快大女Giselle已經8歲，寶貝女漸漸成長大個女同媽咪餅印一樣。Jinny喺23號Po出一輯同愛女慶祝生日嘅相，一家人切蛋糕嘅時候，見Jinny同Alex好肉緊咁左右夾攻啜爆囡囡，細佬亦攬實家姐，畫面相當溫馨，相集中仲有一家人外遊到沙灘享樂嘅照片，估計Jinny早前舉家外遊享受家庭樂。

眼見家中小公主初長成，兩夫妻都分別留言，Jinny話：「第八年，感恩趕得切喺收工後返嚟同你慶祝！自從你上了小學後，感覺你突然長大了很多。有很多想法，也有很多問題，媽媽永遠都這麼愛你，希望你繼續健康快樂，慢慢長大。」

而老公Alex亦出Po賀囡囡生日：「Happy Birthday小公主﹗今年選擇一個舒服，主打你想做什麼就做什麼！一家人齊齊整整同你過生日，願你每天都能這樣開心，快樂！I Love you Giselle!@jinnyng @jinnyngfamily」

唔少圈中藝人見到呢個溫馨畫面都有送上祝福，榮升人母、BB啱啱滿月嘅黃翠如都留言賀Giselle：「生日快樂小美人。」Jinny亦回敬「滿月快樂蕭哈哈。」而蔣家旻、呂慧儀、楊秀惠等都有送上祝賀，同時仲有唔少網民仲話囡囡越大越似媽咪咁靚。