中年好聲音3丨播出2.5小時9強之戰 黃博唱功超班驚變樂壇鬼見愁

《中年好聲音 3》今個星期日晚，將播出長達 2.5 小時嘅9 強之戰！本回合主題係「改編歌之夜」，9 位參賽者演唱歌單如下：陳芷盈《深愛著你》、善玥澄 《依然》、劉洋《後來》、王鄭浚仁《愛火花》、李金凱《歸來吧》、占士丁丁《Take me to your heart》（《吻別》英文版）、趙浚承《霧之戀》、黃博《蜚蜚》及張與辰《拒絕再玩》。為令觀眾對《中聲3》9 強有更深入嘅了解同認識，製作組仲為各人安排了單人外景拍攝，相當有心。 
 
今集一大亮點，係全場唯一自彈自唱嘅張與辰；因為呢次佢轉玩Sexy 風格，以慵懶又有魅力嘅聲線彈唱《拒絕再玩》，別具個人風格。張與辰事後坦言希望每次企喺《中聲3》嘅舞台，都可以帶畀觀眾不一樣嘅感覺：「因為我從來未 sexy 過，但又冇胸肌所以攞件 scarf 嚟冚住吓。」婉婉聽完即刻用手觸碰張與辰嘅 Scarf，並開玩笑話：「拉低啲咪得咯。」令獻唱時奔放自如嘅張與辰忽然變成怕醜仔，場面搞笑。 

上MyTV SUPER重溫《中年好聲音3》精彩賽事
 
對於張與辰嘅表現，評審可以話一面倒正評，出名反應王嘅肥媽同海兒，喺台下聽歌時已忍唔住相視而笑兼流露讚歎樣，海兒仲話聽到面紅耳熱：「你把聲好似跳緊脫衣舞咁，可以用聲音做到咁多唔同音色，我覺得可以叫你 Ad-Lib 王子，好正，真係好少聽歌聽到面紅。」肥媽就講笑話聽到頭赤，又指張與辰唱到不羈嘅感覺，覺得任何女人都會畀佢電到呀。張佳添亦大讚張與辰係一個好有才華嘅音樂人，無論咩曲風都難唔到佢；而嘉賓評審潘偉源：「其實我真係嚟睇 show，好精彩嘅音樂會，你今日係一件好精美嘅樂器。」就連出名係百彈齋主嘅周國豐，亦高度評價，並坦言願意為張與辰今次表現比20分滿分。 
  
同樣吸引評審畀出高分數嘅仲有另一位熱門黃博，雖然黃博台上透露唔太敢挑戰《蜚蜚》，皆因擔心自己做得唔夠好；不過由於獻唱時游刃有餘、歌聲亦極富感染力，結果獲得一面倒好評，超過一位評審認為要扣黃博分數難到不得了，肥媽更笑言唔容許黃博以後唱佢嘅歌：「你知唔知你唱人哋嘅歌，人哋有壓力㗎？黃博我哋要喺雞蛋裏面挑返嗰一分出嚟知唔知幾鬼辛苦，但點都要減佢多少嘅，因為佢織冷衫都入咗去（final）㗎喇。你係好投入、好享受你嘅歌，你好有自己。你以後唔好唱我嘅歌呀，唔係偷鬼咗我嘅歌！」海兒就話：「我哋暫時冇睇到你有駕馭唔到嘅一次，全香港嘅歌手都擔心緊你唱佢啲歌，真係唱得非常之好。」張佳添：「你能夠將呢首歌由 microdynamics 再去 macrodynamics，你簡直帶我哋上山落海，情感好足好澎湃，差唔多 perfect。」周國豐：「你今日聲音狀態好好，接近Hi-Fi 發燒嗰種狀態，無論感情聲音控制都好好。」 

《中年好聲音 3》4月27日（周日）20:00 翡翠台．2.5 小時 9 強戰