謝霆鋒一連四晚啟德騷開鑼 親錄製車站廣播教觀眾點入場

相隔25年再喺香港舉行演唱會嘅謝霆鋒，一連四場喺啟德體育園主場館舉行嘅演唱會喺24號晚開鑼。霆鋒以金曲《不要說謊》為演唱會打開序幕，之後再先後獻唱《改造人》及《活火山》，唱完三首歌後，霆鋒就除低黑超笑住同在場觀眾打招呼。

雖然演唱會喺晚上七點半先開始，但係喺下晝四點半，場館門外就已經聚集咗唔少粉絲，當中有唔少人排隊搶購 T恤、黑膠碟、CD、環保袋、海報、口罩等演唱會紀念品，其中一款T恤更喺開賣無耐就已經火速售罄。

除咗有唔少嚟自世界各地嘅粉絲到場應援外，亦有唔少歌手藝人都到場欣賞霆鋒嘅演出，當中包括：張敬軒、容祖兒、蔡卓妍、周勵淇、關智斌、何佩瑜等等，而拉姑同鬍鬚Kong亦早早到場喺場館內招呼朋友。

霆鋒嘅妹妹謝婷婷，雖然身處外地未能親身到場支持，但佢就有喺社交平台曬出同哥哥嘅童年照，隔空為哥哥打氣：「Absolutely devastated I won’t get to see you live in action but I will 100% be there in spirit, by your side, as always.Go show ‘em how it’s done,哥哥.IT’S.GONNA.BE.EPIC.LOVE YOU!!(And to everyone who is going to Nic’s concert —enjoy every second and pls cheer extra for Sara and me!!!)」字裡行間，都感受到兄妹情深。

另外，開騷前，霆鋒更預先為港鐵錄製車站廣播，提醒粉絲要順住人群入場，唔好逆行，咁就可以準時去到啟德體育園睇演唱會喇。