黃宗澤得知未被邀上節目原因爆笑 胡杏兒人氣急升戴后冠北上掘金

內地近年有唔少綜藝節目都鍾意邀請香港藝人做嘉賓，黃宗澤Bosco、胡定欣、吳卓羲等早前亦應邀作客綜藝節目《今晚好犀利》，不過Bosco喺節目中就鬧出個笑話！
 

事緣係節目中Bosco同定欣與遠在外地嘅鍾嘉欣電話連線，希望邀請對方上呢個節目，點知嘉欣就話大家30號就會見面，搞到Bosco一臉錯愕，仲問點解會冇人邀請，旁邊嘅吳卓羲聞言就反問：「你係咪會嚟先？」Bosco就話自己忙住拍《新聞女王2》所以無時間。

本身講到呢度大家就以為件事完咗，點知呢個時候Bosco又聽到30號當日定欣都會在場，即時搞到Bosco嬲嬲豬，再次問點解冇人邀請佢，於是定欣就露出奸計得逞嘅笑容，表示30號當日仲會有Bosco嘅舊愛胡杏兒在場，聽到呢個「原因」後，Bosco即時大笑到停唔到，仲話：「難怪沒請我。」吳卓羲呢個時候再補刀表示：「他們兩個人來，我們都不用在了。」
 
雖然呢段小插曲雖然被網民覺得充滿節目效果，認為三人嘅表情反應都好好笑，但有人就反而覺得「Bosco笑得好難過」、「好像強力笑著，但像是要哭一樣。」、「用笑聲掩飾尷尬。」
 

至於杏兒雖然早前被爆出老公喺派對同女性親密抱抱嘅風波，不過無阻佢努力事業北上掘金嘅心，加上佢同孫儷演出嘅劇集《蠻好的人生》近期播出後反應大好，令杏兒人氣急升工作量大增，都有唔少登台商演！最近杏兒喺出席品牌活動時仲身穿旗袍、戴上當年嘅港姐后冠登場，加上大會用港姐經典主題音樂襯托佢出場，令杏兒好似再選一次港姐一樣。

雖然杏兒已經係三子之母，不過大家都認為而家嘅佢無論係氣質定係外型都比當年參選時狀態更好，非常有女人味同凍齡。