中年好聲音3｜賽事漸入尾聲越戰越激烈 黃博繼續大魔王本色唱陳僖儀名曲

歌唱節目《中年好聲音3》賽程眨眼間已經進入尾聲，今個星期日27號晚上演8強晉級賽，更有資深填詞人潘偉源做評審。呢次賽制回歸個人賽，九強選手精選一首改編金曲出戰。

即刻登入 myTV SUPER 重溫《中年好聲音3》賽事
 

有「大魔王」之稱嘅黃博就揀咗陳僖儀嘅《蜚蜚》出賽。肥媽大讚黃博表現亮眼，仲話：「你成日偷咗人地首歌，你唱到好似係你嘅歌，首歌被你擁有咁。」至於李金凱呢次就挑戰師兄譚輝智喺上一季出賽時唱嘅《歸來吧》，令肥媽有被唱入心嘅感覺。九強選手嘅表現各有出色，令潘偉源都話好頭痛，更笑言唔明點解TVB會邀請自己做評判，自己係嚟睇Show。
 
由於呢個回合會淘汰1人，暫時累積分沉底嘅善玥澄、趙浚承、王鄭浚仁都特別緊張。趙浚承就話自己有「中年危機」，所以希望自己可以好好演唱《霧之戀》呢首歌，而且呢首歌係對自己好有重要。王鄭以《愛火花》出賽，佢坦言嚟錄影前一晚心情七上八下，完全瞓唔著，不停諗點樣可以唱得好、可以打動評審。王鄭仲話自己參賽以嚟都病咗四次，每次嚟香港都會病，所以自己都要每日都練聲，以免被病影響表現。至於善玥澄揀林憶蓮《依然》出賽，因為佢覺得自己喺成段賽程都係唱國語為主，嚟到比賽尾聲，自己都想有新嘗試。