林子善為泰拳比賽頒金腰帶 因學泰拳契機踏上「爆肌之路」

日前舉行嘅一個泰拳MMA比賽，香港傑出泰拳運動員 陳原卉 挑戰職業泰拳世界冠軍金腰帶殊榮，多位香港泰拳精英運動員同香港代表隊成員挑戰洲際冠軍殊榮，賽會更邀得 林子善 擔任第四場拳賽頒獎嘉賓，頒發拳王腰帶。

今次比賽除咗香港運動員外，仲有來自世界各地選手，包括中國、英國、法國、德國、泰國、日本等來港獻技。子善從小接觸泰拳運動，更因拍劇而打泰拳加健身減肥，改變心態，用9個月時間，踏上「爆肌之路」，教練包瀖森亦算係佢半個人生導師。

被問會否教女兒打泰拳﹐子善就指自己都只係學生，如果女兒想學會搵教練幫手，因為泰拳兒童班比較適合，不過就會等女兒長大後有自己嘅興趣再決定。

賽會將部分比賽收益捐助閱讀夢飛翔慈善教育基金，而子善就指香港泰拳發展越來越好，希望政府增撥更多資源發展泰拳運動，因為泰拳運動非常正面、健康、亦可鍛鍊身體。