新節目《聲秀》首日面試海選 聲夢Junior劉芷晴練兵數年氣質歌藝大躍進

為發掘有潛質樂壇新星，全新歌唱節目《聲秀》喺今日進行首日海選，經已有數百人報名，而著名音樂製作人 Eric Kwok 同 陳奐仁 音樂監製 張家誠 以及將會擔任節目導師嘅 譚耀文 劉浩龍 吳浩康 同 胡鴻鈞 都有現身面試參加者，總經理曾志偉亦有到現場。

呢日面試者年齡介乎16至29歲，更有參加者由內地、馬來西亞同加拿大來港參加海選。多位16歲嘅美少女表現淡定，包括來自吉隆坡嘅陳潔怡同本地學生張欣翹。面試年紀最大嘅29歲朱海橋來自加拿大，染咗一頭金髮嘅佢有幾分似《中年好聲音》冠軍周吉佩。

當中亦有參加過其他選秀節目嘅朋友，好似有曾經參加過《聲夢JUNIOR》嘅353號劉芷晴(Elsa)，Elsa當年係Eric Sir戰隊嘅學員，佢之前因為未能入圍《聲夢傳奇2》感到失落，坦言話係邊度跌低邊度企返起身，幾過幾年嘅練兵，無論唱功同外貌都有超大進步，再見Elsa，Eric都大讚佢成個氣質都唔同咗。

同樣係再度參加選秀嘅337號甄珮娸現年28歲，佢因為表現得到譚輝文讚賞而激動爆喊，另外參加過中央電視台《星光大道》；曾經同龍婷合唱嘅319號江陽，亦表現得相當淡定。

海選中亦不乏外形亮麗嘅參加者，好似染咗一頭綠色長髮嘅KOL楊森如、樣子甜美嘅大學生柯雨霏、有混血Feel嘅林潔心等，而324號嘅潘致毅身形高大，任職精神科醫生嘅佢更希望追逐歌唱夢。自稱係獨立歌手嘅354號參加者鍾凱瀅亦自彈自唱自己創作嘅歌曲，大騷音樂才華。