譚倩紅現身與友人茶聚臉色紅潤玩Bingo相當精靈

於90年代TVB長壽處境劇《真情》入面，飾演容姨一角而深入民心嘅譚倩紅，唔經唔覺已經淡出幕前21年，過住退休生活嘅容姨，不時會與好友飯聚享受生活。

日前資深傳媒人汪曼玲就Po出多張與好友茶聚嘅照片，當中除咗有張兆輝、古天樂媽媽、冬嬸、梅小青劉家豪夫婦外，容姨亦係呢次茶聚嘅坐上客，汪曼玲喺帖文中寫道：「多謝老虎請三圍枱36人在名廚飲茶。好似過年咁熱鬧，好似開嘉年華會。除可口點心外，更每人奉上六合彩一張。今晚開獎，帶給大家中獎財運。另外又玩Bingo,有啲好運，連中兩次，我係一次都冇中，不過都戥人開心。」而相中所見，容姨面色紅潤精神相當不俗，佢同冬嬸都相當幸運，玩Bingo時有所收穫。