《西遊記》拍檔相隔30年重逢 朱茵與羅家英合演舞台劇掀回憶殺

朱茵 同 羅家英  李子雄 一同參演內地舞台劇《驢得水》喺內地巡迴演出，日前到深圳公演，今次係朱茵同羅家英自電影《西遊記大結局之仙履奇緣》後再合作，相隔30年「紫霞仙子」同「唐三藏」喺話劇舞台中重逢，掀起觀眾一輪「回憶殺」。

朱茵同家英哥再次合作深感與奮：「大家多年冇合作，今次難得同台有種莫名嘅親切感！家英哥真係好厲害，一踏上台板就狀態大勇，非常專業；另外子雄哥都好厲害，演繹反派嘅特派員，相當淋漓盡致！」

擔任女主角「張一曼」嘅朱茵，演繹一位悲劇人物，難度甚高。朱茵入組前花咗四個月分析角色，所以到排戲時對角色非常了解，加上劇本以廣東話演繹，感覺非常親切，令佢一演難忘！而佢另一個挑戰就係要著旗袍同皮鞋演出，整齣舞台劇歷時3小時，要著皮鞋喺台上跑來跑去，又因為旗袍戲服，令佢時刻要好好控制身型。

朱茵亦分享劇中一場自摑戲份相當大挑戰，佢要邊自摑邊處理極致心痛嘅情緒：「每場演出後都會同導演開會，好似自摑呢場好重要戲，大家商量後為令對手更有壓迫感，由試演時自摑7至8下，到正式公演改成10幾下瘋狂自摑，難度更高。練習咗好耐，要摑得夠響，同時唔可以打到耳仔，加上角色要面對連番被背叛，開頭我準備角色時試過喊去表達，但後來發覺忍住唔喊又熱淚盈眶嘅演繹更能展現倔強。」

呢次朱茵嘅演出，老公 黃貫中 以及同門師妹 黃智雯 都有捧場，而囡囡就因為返學未有現身。朱茵透露之前刻意唔俾老公睇劇照，想等佢入場睇時候，喺無預設嘅情況下感受角色，果然阿Paul睇完之後都話相當感動。