StarTalk丨丁文俊新歌反思單身生活 與舊拍檔戴偉合作重燃火花

《中聲》唱將丁文俊等咗30年，終於擁有人生首支單曲《人有無數可能》，佢仲作客《StarTalk》接受主播許文軒專訪，大談新歌嘅製作過程。Angus話同負責曲詞嘅李峻一相識多年，當初對方話幫佢寫首歌，仲話以歌曲《沒那麼簡單》作為藍本，想呈現單身自在嘅感覺。經已單身咗十年嘅Angus話年紀越大，對愛情就越多考慮，佢話自己都想拍拖搵個伴，但會諗到要涉及兩個家庭，同埋朋友圈等事宜，就會停一停。

新歌同時令Angus對人生有所反思，諗清楚自己要咩生活，正如佢同李峻一年紀相約，但對方經已一家四口，小朋友都十幾歲，而李峻一亦會思考如果當初無結婚，現在嘅佢又會怎樣。即使如何，Angus覺得歌曲最尾帶出，不論係獨身定談戀愛，其實生活都要過，要好好活出自己。

新歌搵嚟組合A-dAY拍擋戴偉擔任監製同編曲，Angus以休眠組合嚟形容佢同戴偉，其實多年嚟佢哋都有喺音樂合作，但係今次製作自己單曲，喺錄音室嘅時候，勾起好多回憶同火花。Angus又話當初眼見拍檔喺電影配樂獲得好成績，而自己好似遠離樂壇，心中係有無力感，而今次能夠出歌，佢會放長遠去看，唔會畀自己任何壓力。