戴祖儀樂拍新寵物節目《寵你一世》 自認「奴才」命當愛犬係皇帝

戴祖儀 有份主持嘅全新寵物節目《寵你一世》呢日拍攝，本身Joey家有一隻狗仔，而Studio就養咗三隻貓貓，照顧動物相當拿手，見到參加拍攝嘅狗仔同貓貓更係玩到唔想收工。雖然好多演員都話同小朋友或者動物合作難度最高，不過Joey就反而覺得好幸福，佢話估唔到平日生活同工作中一樣浸沉喺同寵物玩嘅幸福之中。

好多人都會將寵物當成自己嘅仔女，有乜嘢最好嘅都會俾晒佢地，Joey當然都唔例外，佢透露愛犬平時享受皇帝級待遇，好食嘅生果，最靚嘅部分一定由愛犬先食。因為愛犬恃寵生嬌有少少脾氣﹐所以佢都唔敢冒險帶愛犬上節目，擔心變成整蠱自己。

Joey笑言要透露拍節目好好學習收伏愛寵技巧，希望愛寵同拍節目嘅貓貓一樣溫順。Joey更向大家呼籲節目正進行大招募，希望主人們可以投寄同毛孩們嘅得意影片，有機會喺節目度播出。