霆鋒演出四哥缺席惹揣測 旅客海濱巧遇精神十足微笑揮手

謝霆鋒 剛剛完成4場啟德個唱演出，席間唔止女友 王菲 現身投入起舞，媽咪拉姑、兩個囝囝 Lucas同Quintus 亦都先後於現場出現，亦成為現場觀眾嘅拍攝對象，不過一向型爆嘅 謝賢 就連日未有出現，令外界一度擔心已年屆88歲嘅四哥身體情況。

不過大家大可放心，因為完騷後就有旅客於尖沙嘴海旁偶遇四哥出現，四哥現身海濱公園，雖然以輪椅代步，不過坐姿腰骨挺直，依舊戴上招牌黑超，同兩位陪同朋友齊齊由頭到腳全黑打扮，同過往一樣依舊有型。

四哥見到途人拍攝時，亦面露微笑與對方揮手示好，更與對方握手，其後就沿路離去繼續散步享受日光浴喇。其實去年亦有人於西九文化區遇上四哥，當時四哥雖然早已登上座駕，但仍友善打開車門與途人合照，非常親民。

2021年，四哥以84歲高齡憑參演嘅《殺出個黃昏》勇奪金像獎影帝，同年一舉成為香港電影評論學會最佳男演員、又獲得電影導演會年度最佳男主角，更係年紀最大嘅三料影帝，認真寶刀未老。