白雪仙家中慶祝97歲生日 紅粉緋緋接受徒弟好友賀壽

仙姐白雪仙一向深受粵劇及各界人士敬重，每年到佢生日嘅時候，一眾徒弟同各方友好都會齊集佢位於跑馬地逸廬嘅寓所慶祝。

今年已經係仙姐97歲生日，大家一早就到仙姐屋企悉心佈置，除咗喺窗戶貼上巨型心心氣球，又準備好唔少佳餚美食，徒弟陳寶珠、梅雪詩同謝雪心就向師傅祝壽。

當大家為仙姐唱完生日歌之後，仙姐非常開心許願同切蛋糕，更逐一向大家派雙封寫上「任」字嘅利是，祝願大家同佢一樣健康平安。資深傳媒人汪曼玲都參與生日飯局，佢大讚「仙姐真犀利，97歲，仍然非常精伶，打扮優雅，頭腦清晰敏捷。不愧是梨園界泰斗，殿堂級的存在。」