水餃皇后丨馬麗夢想成真演劉偉強作品 惠英紅袁富華勾為口奔馳回憶

由金像導演劉偉強監製及執導嘅新戲《水餃皇后》舉行慈善首映禮，戲中演員馬麗、惠英紅，袁富華、江美儀、余安安等現身出席，華人文化董事長黎瑞剛、全國政協常委吳良好、香港電影發展局主席王英偉、TVB主席許濤以及不少政商界嘉賓，圈中亦有不少藝人參與盛會，場面虛冚熱鬧。

電影改編自真人真事，講述上世紀七十年代臧姑娘來港賣水餃謀生嘅故事，拍慣剛陽味電影嘅劉導演，都話被呢個劇本深深打動，誓要將呢位傳奇女子嘅奮鬥史，活現喺大銀幕。劉導演直認係搶部戲返嚟拍，因為冇人會諗起佢識拍呢類電影，加上呢個係一個好地道嘅香港故事，好感動。當初聽到製作預算唔多嘅時候，佢就話自己會控制，因為太想接拍呢個故事。

馬麗被問到接拍原因，佢話首先係好崇拜劉導演，能跟對方合作係一個夢想。過往以喜劇角色聞名嘅馬麗，呢次一改戲路，挑戰演一個充滿層次既角色，為咗演活臧姑娘呢位人物，佢仲努力用心去練包餃子。

飾演「包租婆」嘅惠英紅，同飾演「糖水伯」嘅袁富華都話拍呢部電影，勾返起唔少成長回憶以及當年為口奔馳嘅艱苦生活。紅姐話好多人都知道佢喺灣仔賣咗十幾年香口膠，喺嗰啲環境下，每日都見證生離死別，人情冷暖，但當然亦有溫情互助嘅畫面。

袁富華指當年自己都做過小販，賣翻版成衣，喺經營嘅過程接觸到好多唔同嘅人，令佢成長不少。呢部電影係以水餃為題，而水餃本身有團圓、好運嘅寓意，原來唔少藝人更係水餃嘅粉絲，好似譚俊彥、羅天宇、張馳豪等。