雲浩影獲男友T-Ma陪返海南探親 高調晒愛首貼甜蜜合照放閃

阿Cloud雲浩影年初嘅時候宣布同音樂人馬敬恆T-Ma拍拖，雖然被傳媒拍得出入男友家疑似同居，又透露情人節時獲男友下廚撐枱腳，但一對戀人就一直未有分享合照。

直至T-Ma 5月1號喺社交平台首度公開佢同女友Cloud喺海邊騎馬嘅同框合照，旋即閃爆網友，佢仲寫上「第一次來海南～還做了蔥油麵！」原來今次T-Ma做跟得男友，陪阿Cloud返海南島探親。阿Cloud翌日亦喺社交平台放閃，仲記錄底男友落田嘅畫面，佢話：「返鄉下做鄉下妹，耕下田，餵下雞。沒有冷氣，只有風扇和蚊帳，不要忘記回家的溫暖，樸實的生活有平凡的幸福。」

相信一對戀人深深體會到咩叫平淡就係幸福，即使無精彩嘅行程同華麗嘅酒店佳餚，都深深感覺到幸福。阿Cloud亦喺文尾祝願公公婆婆身體健康，身邊的人都幸福快樂。不過公公婆婆應該最開心係見到孫女帶男友畀佢哋見面。