碧咸半百牛一公開珍貴童年相 發長文回顧來時路感謝家人

5月2號係萬人迷 碧咸 嘅50歲生日，佢喺社交平台上載咗多張自己童年相、同屋企人嘅童年珍貴合照，仲有同太太Victoria以及四個子女嘅合照，並且發長文感念自己一路走來嘅點滴。

碧咸寫到：「在回顧呢個生日嘅同時，我對生命中許多事物充滿感激。曾效力過嘅球隊、同我並肩作戰嘅隊友、指導我嘅教練、一路支持我嘅球迷、我嘅國家，以及曾擔任英格蘭隊長嘅經歷。」

碧咸話自己非常幸福，不過無論事業幾成功，佢最大嘅成就永遠都係屋企人：「我感謝我嘅父母，佢地為我犧牲許多，先令我能實現成為職業足球員嘅夢想。」佢又感謝姊妹同爺爺嫲嫲一直以來嘅支持。當然最重要嘅一定係太太同子女：「謝謝我太太，亦係我最好嘅朋友，我們已經相伴28年。我親愛嘅孩子們—Brooklyn、Romeo、Cruz同Harper，你們係我每日起身嘅動力。多謝你們帶比我笑容，令我成為更好嘅人。我深深愛著你們，多謝你們讓今天變得如此特別，你們係我嘅全世界。」

太太Victoria亦分享二人相擁跳舞嘅影片，兩公婆sweet到爆。碧咸之前為生日提前搞咗個暖壽Party，不過大仔Brooklyn就因為細佬Romeo同佢嘅前度拍拖而拒絕出席家庭聚會再度冇影，兩兄弟疑似因為女人反目，相信碧咸其中一個生日願望，應該希望兩兄弟可以和好如初。