Eason首於日本個唱演出全場爆滿 憶當年首訪當地食壽司驚為天人

陳奕迅 由2022年已展開嘅世界巡迴演唱會，星期六移師日本舉行，今次更係Eason首度於日本東京舉行個唱，吸引日本本土、香港、台灣、中國內地及各地歌迷，齊聚橫濱K-Arena逼爆現場逾萬座位。

Eason為自己首次日本演出，特別安排「東瀛情懷歌單」：重新詮釋玉置浩二經典《Mr. Lonely X 愈想愈無謂》雙語版本，又驚喜獻唱1995年於日本錄製嘅出道代表作《游離份子》。

佢話：「 呢首歌同日本關係好深，當年唱片公司邀請作曲家蒲田博信為新秀冠軍作曲，所以我有幸唱到佢嘅作品。我人生第一次到日本，第一次喺目黑區錄音、六本木拍MV，MV係郭啟華執導同親自拍攝。第一次食到日本壽司都係呢一年，郭啟華仲笑我，『吓？你第一次食壽司？』非常多美好回憶。」

Eason又改編西村由紀江鋼琴曲嘅《傷信》演繹，當然未有漏低《富士山下》，Eason亦笑道：「嚟到日本點可以唔唱呢首？」前奏一響就引爆全場歡呼雷動。

已歷經全球159場演出嘅Eason╴盛讚橫濱場館係「最佳音響聖殿」，佢仲唱得非常之享受，而現場歌迷就形容呢晚演出係: 「最完美狀態演繹所有曲目，最極致聽覺體驗 ！」

日本著名鋼琴家西村由紀江，呢晚仲自已買飛支持，大會亦馬上邀請佢到後台同Eason見面。兩人首次見面都非常高興，西村仲向Eason表示，觀眾席上聽到佢提及自己三次，覺得非常感動。

今次日本演出，亦令Eason覺得傷感，為演唱會設計舞台服裝嘅設計師瀨尾英樹(Hideki Seo)去年因病離世。瀨尾2019年起為Eason設計巡演服裝，可惜因病一直未能現場親睹作品亮相舞台。而瀨尾太太特地召集丈夫生前團隊，以瀨尾先生過往設計元素，為Eason訂製全新舞台服裝，呢晚仲帶同父母以及丈夫遺照入場欣賞演出。

都市傳聞指今年日本將發生地震災難，而演出後翌日早上當地就發生4.1級地震，不過Eason就他笑言：「我一啲都感覺唔到震動，好似我演唱會主題一樣啦，唔好過份over thinking , 未發生別當真！從來冇擔心過，反而睇新聞知道日本百日咳好厲害，所以今次嚟東京都好少出去，保護自己免得演響演出，完騷後放下心頭大石，今日終於可以同家人出去食個拉麵喇！」

唔少香港歌迷都不停提出，希望Eason將巡演移師返香港啟德「埋齋」，Eason就幽默回應話：「遲啲再講啦，我從來都唔係第一時間update手機型號的人，幾時換？哈哈，總會有一日換新型號嘅。 」