楊丞琳淚謝離世工作人員教廣東話 性感造型作香港場Bonus

楊丞琳近日被台灣藝人Makiyo（川島茉樹代）於節目中斥紅咗後唔認人，除咗楊丞琳嘅一眾圈中好友睇唔過眼出言力撐外，佢嘅fans亦無條件撐偶像，4號楊丞琳喺香港亞洲國際博覽館 Arena舉行世界巡迴演唱會香港站時，fans們都自發組織應援活動，除咗設立打卡位外，仲大派應援物及留言板，以行動支持偶像！

除咗fans應援外，仲有唔少圈中好友送上花籃祝賀，當中包括劉德華、容祖兒、Twins、張栢芝、王祖藍夫婦等，而陳妍希更驚喜現身捧場！

楊丞琳以勁歌熱舞《BAD LADY》作開場曲，之後又以廣東話向Fans打招呼：「香港嘅朋友有冇掛住我？好耐冇見！係咪好多人喺其他地方飛嚟？我好掛住你哋。」佢仲搞笑話今晚嘅性感造型喺香港fans嘅bonus！

呢晚楊丞琳不時與台下樂迷互動，大派飛吻同心心，而當佢聽到有人讚佢靚時，佢就鬼馬咁話：「知道我唔似40歲，20歲呀嘛！講笑咋，隨着年紀嘅變化唱歌聲音都有改變，人生不同階段味道不一樣，今晚演唱會是彷彿重走自己青春一遍！」

據知楊丞琳為香港站嘅舞台豪花數百萬，除咗有大量機關外，舞台嘅大屏幕更係配合多重投影畫面與特效，令觀眾睇得更投入。

楊丞琳每次嚟香港開騷都一定會唱廣東歌，今次佢就選唱咗《我們都是這樣長大》、《越難越愛》、《俏郎君》，期間更一度感觸落淚：「香港有好多工作人員睇住我成長，其中一位去年離開咗，以前係佢教我拼音，同埋教我唱廣東歌一定要標準。雖然我係廣東人，但係我嘅背景唔係成日講到，所以每次唱廣東歌都要下苦功，唔係意思就算！」