Sucy養腳傷意外養大肚腩仔 家姐Lucy麻甩鬍鬚造型曝光

李璨琛 同太太 梁志瑩 嘅兩個寶貝女，7歲大女Lucy李元元以及兩歲細女Sucy李斐斐，因為外貌可愛加上身型圓碌碌而圈粉無數，成為最受關注星二代。日前Lucy媽喺社交平台Post相指Sucy右腳離奇骨裂，見Sucy右腳紮上繃帶，真係我見猶憐。

事隔兩日，Lucy媽再上傳兩姐妹坐喺梳化睇電視嘅相，見到Sucy右腳依然紮住繃帶，不過精神唔錯，揸住水樽挨住家姐Lucy，兩姐妹睇電視睇得好投入，媽咪就留言話：「阿妹受傷呢幾日冇乜點郁，個人都肥咗有返個肚腩。」再加上三個哭笑不得嘅emoji。

相中Sucy睇上去精神唔錯，亦識得對鏡頭笑住打招呼，好多網友除咗關心Sucy嘅腳傷，亦紛紛留言大讚兩姐妹可愛，有網友留言「家姐左手又放係妹妹上面，妹妹又放隻手係家姐度，好鬼痴纏」，「有家姐仔錫住妹妹陪伴，妹妹個樣幾開心似乎唔記得痛痛」，亦有網友搞笑話「家姐今日嘅造型有鬍鬚嘅」，「家姐做咩搞到成個麻甩佬咁」，不過講笑還講笑，相信大家共同嘅心願就係祝福Sucy可以早日康復。