周華健澳門演出帶觀眾重遊武俠世界 28首金曲全場觀眾由頭唱到尾

周華健 日前喺澳門舉行兩場巡迴演唱會，吸引來自五湖四海嘅歌迷專程到當地欣賞。演唱會為《少年俠客》雙主題，上卷以武俠為主題，華健化身「俠客」，而舞台就以科技效果營造出武俠片意境，突顯出江湖豪情。

觀眾們喺俠骨柔情嘅音樂中，同華健一齊高唱多首90年代武俠電視電影歌曲，好似《俠客行》、《男兒當自強》、《凡人歌》和《愛江山更愛美人》等，氣氛熱烈，尤其當《滄海一聲笑》嘅經典前奏響起，近萬名觀眾自發起立揮動熒光棒，將場館化作流動的星海。

而喺《少年》主題部分，華健就帶嚟《風雨無阻》、《你現在還好嗎》、《讓我歡喜讓我憂》、《愛相隨》、《朋友》、《花心》和《少年》等膾炙人口曲目，令歌迷瞬間穿越到青少年時期，更喚醒歌迷嘅回憶同共鳴。

喺近3小時嘅演出，華健連續演繹28首金曲。到Encore環節佢仲邀請全場歌迷一齊完成《朋友》嘅「跨世紀大合唱」，唔少觀眾聽到歌詞「一句話，一輩子」均感觸良多。

呢次演唱會嘅舞台設計別具一格，配合上下卷呈現截然不同嘅設計，上半場舞台以「捲軸敘事」為核心概念，構建出移步換景嘅武俠幻境。當華健身着水墨披風吟唱《俠客行》，巨型紗幕實時投射出潑墨山水，呈現「聲光電武」完美融合的新派國風美學；轉場至《愛相隨》時，舞台又幻化成都市天台，升降鋼琴伴着萬家燈火緩緩升起，令華健都讚不絕口。