胡杏兒現身為擁抱者老公拆彈 方力申以笑回應太太懷孕傳聞

劉嘉玲、舒淇、韓星阿Rain、陳慧琳、張柏芝、蔡卓妍、方力申、何超儀、陳子聰、魏浚笙、林嘉欣同胡杏兒等盛裝現身澳門一個活動。

兩個月前，杏兒嘅老公李乘德被拍到夜店攬女而鬧到滿城風雨，當時杏兒喺社交平台以「擁抱者論」嚟回應此事，但就未有現身回應，日前佢出席一個品牌活動時，活動亦改為閉門進行，杏兒未有接受傳媒訪問。

直至呢次活動，杏兒終於首度現身解說「擁抱者論」，解釋攬女風波只係誤會一場，當晚在場都係親戚同密切嘅好友，杏兒指老公攬嘅兩位女士，自己都認識多年，而兩位女士嘅丈夫亦有在場跟老公擁抱，仲強調夫婦間無問題。

杏兒指翻查閉路電視後，發現有一名男子單獨入到餐廳影相，而老公當時亦知道被拍，但佢自覺無行差踏錯。杏兒亦指老公自事件後，都減少去公眾場合，但身為太太唔會阻止老公嘅社交活動，佢又指自己一直無擔心過老公出錯，因為有任何事自己會感覺到。不停護夫嘅杏兒努力拆彈，對於上次活動拒絕受訪，杏兒再指亦係誤會，因為工作係內地經理人接洽，佢唔知有香港傳媒到訪，當佢知道時就想做訪問，但大會表示唔使接受訪問而將佢帶走。

以大露背現身嘅嘉玲相當搶眼，佢話呢排雖然好忙，但係就樂在其中，仲話想快啲拍多啲戲，現時睇劇本當中，又透露近兩年多咗舞台劇嘅演出邀請，對於未演過嘅角色就最令嘉玲感興趣。舒淇呢日同樣性感登場，上個月啱啱過咗49歲生日嘅佢，因為工作比較忙，所以只係同老公馮德倫簡單食飯慶祝，但已經同樣感到幸福感滿滿，因為每一日都係佢哋嘅情人節。

講到幸福，當然唔少得新婚無耐嘅方力申啦，日前有傳小方嘅太太成功懷孕，呢日小方被問到係咪就快做爸爸？佢就似乎用笑嚟默認，仲解釋自己一直都係開心果愛笑。

阿Sa神采飛揚現身活動，唔通真係好似佢老友容祖兒所講有愛情滋潤？事關最近有報導指佢同舊愛石恒聰復合，阿Sa指老友Joey工作太忙而導致思覺失調，唔知點解Joey知道一啲連佢自己都唔知嘅嘢。雖然阿Sa冇正面回應係咪復合，但再次澄清根本無梁超怡介入嘅事，佢唔明點解有咁嘅事傳出嚟，對於任何一方都好慘。

魏浚笙早前拍戲時遇意外，頸部嚴重受傷，負傷出席嘅佢直言覺得自己當時半隻腳叉咗入鬼門關，佢話當日拍攝wakesurf（無繩滑水），但當時拍攝係需要拉住條繩，點知佢跌落水後，條繩纏住佢條頸一個圈，快艇又繼續行駛，幸好幾秒後自己鬆綁得到，但直認有諗過會窒息。

忙緊拍劇嘅阿Rain，活動後未有機會周圍玩，因為又要趕返韓國繼續開工，佢透露飾演角色係拳擊手，如果鍾意睇動作同武術片嘅觀眾，一定會鍾意。