何超蓮孖細佬何猷啟慶祝34歲 全家福合照未見老公竇驍身影

生日快樂呀！5月9號係賭王一對龍鳳胎何超蓮同何猷啟嘅34歲生日，正所謂自己嘅生日就係媽咪嘅受難日，一對壽星仔女都非常孝順，喺屋企同媽咪陳婉珍一齊切蛋糕慶祝，家姐何超雲都寫上「兩隻小豬過生日啦」，但係成家人嘅全家福合照，就未見超蓮結婚兩年嘅老公竇驍。早前猷啟榮升為東華三院主席時，即時賭王幾房家人到賀，相片中亦同樣未見竇驍蹤影。

超蓮生日第一彈就同家人一齊過，之後佢就會合一眾朋友齊齊慶祝，當中就有佢嘅閨密李蘊。回復單身嘅Renee喺生日派對上都玩得好盡興，仲自拍短片親吻壽星女，又分享咗舊年同超蓮慶祝生日嘅短片，即使一早要開工，Renee都話自己凌晨三點幾先瞓，果然夠老友。