失婚李蘊憂心細仔半夜咳到喊 獲女兒送戒指賀母親節勁冧

前少女組合Cream成員 李蘊 3月底時自揭已離婚兩年，雖然豪門婚姻夢碎，但李蘊非常疼愛一對子女，離婚消息傳出初期有指李蘊隻身返港居於母親名下公屋，子女則於廣州由爸爸照顧。不過李蘊一直未有透露太多關於子女嘅撫養問題，只透露有同子女傾過父母離婚，亦積極全面復出娛圈維持生計。

失婚後嘅李蘊喺母親節前夕，更鮮有更新同子女互動畫面，珍惜親子時間。見李蘊同細仔一齊趴喺床上托腮，原來囝囝不適病倒，佢話：「睡覺前還很精神的小伙子，一睡覺就不停咳嗽，很辛苦咳到哭了。」作為媽媽嘅李蘊心急如焚，零晨3點半走落街買葯俾囝囝，而阿仔一直咳又一直飲水，半夜更瀨尿要換褲沖身，幸好食葯後有好轉，一覺醒來後就精神晒，仲戴上一個鴨嘴口罩，令李蘊可以鬆一口氣。

而另一個驚喜就係李蘊收到女兒用紙摺成嘅戒指，更親自戴到媽媽手上，令李蘊勁心甜留言：「來自公主的母親節禮物。」

李蘊喺2015年嫁予內地金融才俊羅章冠，婚後育有現年8歲大女及6歲細仔，子女一直居於廣州，過往不時曬家庭生活照嘅李蘊近年早未見一家四口蹤影，主要公開自己單人相，以及同閨蜜何超蓮同鄧紫棋出遊嘅花絮，對上一次Po出子女合照更已經近一年前。