劉若英妙計邀秦漢出山 理解瓊瑤選擇輕生決定

由 劉若英 執導， 秦漢 謝盈萱 主演嘅新劇舉行宣傳記招，呢次更係秦漢相隔24年再拍台劇，亦係佢自疫情至今首次回歸幕前。為咗請呢位大前輩出山，奶茶都花咗唔少心思，佢話當初邀請秦漢時，只係相約對方飲個下午茶，然後先慢慢令佢墮入圈套。

謝盈萱同秦漢喺劇中演兩父女，可以同前輩合作都令佢好興奮。不過喺對戲嘅時候，盈萱就經常嚇親秦漢，事關謝盈萱話有時望住秦漢閒聊，都會莫名其妙流眼淚，搞到秦漢都有啲被嚇親。

作為瓊瑤劇御用男主角嘅 秦漢 對瓊瑤輕生離世雖然感到婉惜，但佢亦非常理解對方嘅選擇，仲話瓊瑤喺佢心目中，係一個勇敢又乾脆俐落嘅人，佢駕馭人生就好似駕馭筆墨一樣，所以佢理解瓊瑤輕生嘅決定。

秦漢話人嘅一生，由出世到長大，好多時都係被動嘅，但係最後一步佢可以採取主動，都未嘗不可。不過佢話講就輕易，但真係做就未必敢喇。