衛蘭任偶像Mariah Carey個唱嘉賓 成天花板級追星族親口示愛

美國樂壇天后 Mariah Carey 世界巡唱日前移師深圳舉行，雖然當日落住傾盤大雨，但一班歌迷著住雨褸睇騷都一樣咁開心，其中一位星級粉絲更有雙倍快樂，事關 衛蘭 應邀為演唱會任嘉賓，喺開場時演唱自己3首作品。妹妹 衛詩 亦有到場支持。

一直視Mariah為最大偶像嘅Janice透露，一個月前收到電話確認做嘉賓時開心到大叫出嚟，更覺得係夢想成真難以置信。到日前綵排時嘅心情既興奮又緊張：「我從未諗過可以出現喺Mariah嘅舞台同演唱自己嘅歌曲，感覺太震撼。好榮幸可以擔任Mariah演唱會嘉賓，到今日演出感覺仍好唔真實，非常感謝佢嘅邀請，會好好珍惜今晚。」

Janice其後更回憶起小時候迷上Mariah嘅過程，佢12歲時，爸爸買咗張Mariah Carey 嘅CD，從此就愛上Mariah並開始聽佢嘅歌曲。Mariah第一首歌係《Vision of love》，佢嘅聲線超有穿透力，非常厲害，之後Janice更開始模仿Mariah唱歌。直到依家Janice都有留意佢嘅音樂，對佢每一隻專輯、每首歌都非常熟悉。

而Janice仲喺演出完，即時同妹妹Jill去觀眾席化身小粉絲聽歌，Janice透露了佢最期待聽嘅歌曲係《Fly like a bird》，現場版本更加震撼，佢同妹妹一邊聽歌，一齊跳舞，非常開心。

演唱會結束後Janice和妹妹Jill即化身「小迷妹」去後見Mariah，同偶像合照同擁抱閑談，Mariah更捉緊Janice雙手恭喜佢。Janice亦上載同Mariah嘅合照分享呢個咁幸福嘅經歷。Janice以英文發文透露自己親自話畀Mariah聽佢係自己人生最大嘅啟發。