藝人母親節｜蕭正楠騷「父乳」向黃翠如賀母親節 薛家燕獲可愛孫仔送花甜在心頭

5月11號係所有偉大媽媽嘅母親節，無論你係子女定已經成為媽媽都祝福大家有個溫馨愉快嘅節日。圈中好多藝人都喺呢日出Po分享愛，今個母親節對成為新手媽媽個幾月嘅黃翠如意義重大，老公蕭正楠特別上載咗翠如抱住寶貝仔「蕭哈哈」一臉幸福嘅樣子，同埋自己赤膊上身騷胸肌嘅相嚟向母親致敬。

阿蕭留言寫道：「我要感謝我的媽生了我，我要感謝外母生了翠如，我要感謝翠如生了哈哈，一路上看着懷孕到出世的過程，才深深知道做媽媽是一點也不容易，就算是餵哺母乳時的痛楚，你也忍耐亦表現得很好，作為父親我係時候要攞出「父乳」，換奶粉錢好好照顧哈哈。」仲叫大家有咩想法可以留言，叫哈媽今日好好享受，最後祝全天下母親節日快樂。翠如更搞笑回覆：「好好地一個母親節，唔知點解有啲咩父乳？」夫妻互動十分有趣。

日前公布懷第二胎嘅 謝婷婷 亦開心分享同阿女及媽媽 狄波拉 嘅合照，感謝媽媽給予佢嘅一切，而身在外地嘅婷婷亦表示好掛住媽咪。三子之母 梁洛施 亦趁住呢個節日出Po祝願天下所有母親都幸福安康。相中嘅Isabella頭帶鴨咀帽配以一身運動服，獲唔少網民激讚狀態大勇。另一位三孩之母 鍾嘉欣 亦曬出一家五口幸福家庭照。

做咗嫲嫲嘅 薛家燕 亦喺呢個日子收到孫仔Julian送花驚喜，並留言話：「只係一個小小嘅舉動，但卻令我甜在心頭，覺得非常幸福、非常開心﹗」而今年亦係 朱千雪 成為人母後首個母親節，獲老公同阿仔送上鮮花，同樣甜蜜勁冧。另外阿Bob 林盛斌 獻出最實際嘅利是俾媽咪同外母，祝福兩位母親快樂、健康、平安。