中年好聲音3｜黃博由頭帶到尾登峯成女王 張與辰劉洋激戰一分之微對決

《中年好聲音3登峯之戰》11號晚假啟德體藝館舉行，盛事邀請到文化體育及旅遊局局長 羅淑佩 以及TVB行政主席 許濤 擔任主禮嘉賓。

經過兩個回合激戰之後，《中年好聲音3》冠軍由黃博以總分212分榮封冠軍，張與辰獲209分成為亞軍、劉洋僅以一分之微208分，屈居成為今屆季軍。

黃博得知成為冠軍一刻顯得難以置信，佢獲TVB行政主席許濤、文化體育及旅遊局局長羅淑佩 以及《中年好聲音2》冠軍 古淖文 頒發10萬元現金獎同獎座。黃博獲獎後多謝《中年好聲音3》節目，令佢有重新追夢機會，重拾夢想、自信、堅持同勇氣。

節目內容營運總經理曾志偉，更即場宣布《中年好聲音4》將馬上來臨，12日早上8點開始接受報名。

賽後黃博、張與辰同劉洋分別與家人亮相《中年好聲音王者駕到》，黃博老公同父母都心情激動。而張與辰則表示冇諗過會獲獎，入到七強係抱住玩吓嘅心態，與辰媽媽則感動表示多謝阿仔完成咗佢嘅夢，呢個獎係佢人生最珍貴嘅禮物，令與辰感觸哽咽。

呢晚除咗四位固定評審 肥媽 張佳添 海兒 同 周國豐 之外，決賽夜請嚟 葉蒨文 張智霖 同 小豬 羅志祥 擔任嘉賓評審，更一同獻唱《第一次》作為開場。而歌唱資歷豐富嘅 林子祥 亦有到現場支持。

七強首回合先後以預先公開嘅必殺歌演出，之後20強選手一同演出《信自己》，完成首回合後由評判同觀眾投票分數加總，七強選手分數分別係：占士丁丁(108分) 趙浚承(108分) 陳芷盈(104分)  劉洋(114分)  張與辰(117分)  李金凱(111分)  黃博(117分) 。

劉洋、張與辰與黃博進入第二回合，而張與辰亦以35.84萬票成為「觀眾最愛好聲音」大獎。第二回合三強分別以自選快、慢歌決一勝負，劉洋《我恨我痴心》/《Without You》、黃博《站在高崗上》/《沒有你還是愛你》、張與辰《大藝術家》/《情人》。

精彩比賽開始前，大會安排大批嘉賓及藝員先步上紅地氈，令呢晚決賽盛事更為隆重，兩屆《中年好聲音》嘅師兄、師姐亦盛裝現身紅地氈環節，身體力行支持《中聲3》嘅師弟師妹。而一眾藝員包括馮盈盈、宋宛穎、莊子璇、張馳豪、朱敏瀚、黃子恆、麥美恩、黃建東、樊亦敏、林景程、傅嘉莉、羅天宇、孔德賢、陳懿德，以及聲夢家族包括姚焯菲、冼靖峰、潘靜文、林智樂、詹天文、何晉樂同黃洛妍等亦盛裝赴會

決賽正式開始前，亦特別安排三屆中聲唱將作精彩嘅暖場演出，王鄭浚仁、顏米羔、李佳、羅啟豪、龍婷、黃劍文 輪流獻唱，預先為整晚演出炒熱氣氛。