周文曦崔加寶娶新抱群星到賀 歐陽震華佘詩曼婚宴合體貼頭合照

晨曦足球隊班主 周文曦 同息影女星 崔加寶（前名崔嘉寶）嘅大仔 周志仁 日前迎娶女友 李沂，一對新人喺五星級酒店擺酒，大批娛樂圈有份量嘅前輩紛紛到賀，場面星光熠熠猶如頒獎禮。

新老爺周文曦同新奶奶崔加寶相識滿天下，婚宴有大批娛樂圈中人盛裝打扮出席，包括譚詠麟、陳百祥、苗僑偉、張兆輝、黃日華、彭健新、方中信、歐陽震華、佘詩曼、任達華、蘇志威、蔡一智、陶大宇、黎瑞恩、郭政鴻、洪金寶夫婦、邱淑貞沈嘉夫婦、郭富城方媛夫婦、張智霖袁詠儀夫婦、林文龍郭可盈夫婦、馬德鐘夫婦、陳浩民夫婦、謝天華夫婦、李克勤盧淑儀夫婦等都係座上客。

Bobby事後喺社交平台分享多張婚宴現場相，佢好開心寫到：「相識四十多年的老朋友文曦榮升老爺，婚禮現場遇到很多很久不見的同行們，太多了，太開心，不能盡錄。祝願一對新人，百年好合，永結同心 。」相中最驚喜係見到Bobby同阿佘呢對老拍檔兼老友再度合體，二人頭貼頭合照，笑到四萬咁口。大批TVB劇迷紛紛留言表示，一次過見到咁多熟悉嘅明星，童年睇TVB劇集嘅回憶全部返晒嚟。