蔚雨芯 5月12號現身東區裁判法院，為廉政公署起訴原名劉蒨樺嘅佢，涉嫌經營醫學美容生意期間詐騙股東投資共580萬元，以及挪用公款逾310萬元，被控以盜竊罪、欺詐罪及企圖欺詐罪等3項罪名上庭應訊。

案件星期一早上喺東區裁判法院首次提堂，庭上陳述案件時指出，被告人於2022年5月至9月期間，涉嫌偷竊股東藝人廖樂宜投資於蒨斯樺醫美逾310萬元資金，並涉嫌向對方訛稱多筆共逾300萬元款項用於購置醫學美容儀器，意圖詐騙而誘使對方唔要求退還投資款項。

裁判官林子康將案件押後至6月30日，以處理轉介至區域法院文件，期間被告獲准以2萬蚊保釋，並不得直接或間接接觸控方證人。

蔚雨芯喺律師伴同下神態自若步出法院，並指公司開業時候有勞資糾紛，但經已處理好，唔知道係咪有人別有用心，事件已交由律師處理，其他事唔再回應。
佢感激呢段時間有好多朋友同傳媒關心，之後佢就拒絕再回應問題，向傳媒做出心心動作就登上守候嘅七人車直駛至位於小欖嘅住所。

案件編號：ESCC1231/2025

蔚雨芯被廉署控三罪名應訊涉嫌偷竊詐騙樂宜投資款項