汪小菲曬子女贈馬筱梅母親節禮物 同具俊曄暴瘦憔悴成極大反差

大S媽媽 黃春梅 啱啱先度過喪女之後嘅第一個母親節，強顏歡笑嘅模樣令人心痛，大家紛紛送上安慰鼓勵，希望S媽可以振作，而大S老公 具俊曄 嘅消瘦憔悴樣更加同之前判若兩人，完全可以感受到佢仍未走出喪妻之痛。但另一邊廂，大S嘅前夫汪小菲喺母親節翌日竟然開直播，開心大騷一對子女送比後母馬筱梅嘅母親節禮物，實在令人匪夷所思。

汪小菲喺直播中分享母親節活動，就係一對仔女同太太馬筱梅一齊整勞作，玥兒同希霖分別整咗唔同配色嘅紙花樽送比馬筱梅，汪小菲仲喺朋友圈晒出希霖送俾馬筱梅嘅手寫卡片，上面寫住「謝謝你常帶我出國，母親節快樂。」雖然睇得出馬筱梅同姐弟相處融洽，但大S過身剛剛百日，汪小菲此一舉動，理所當然惹來唔少批評。

有唔少網民怒罵汪小菲冇人性，食人血饅頭，晒出小朋友送俾後母嘅禮物，等於喺徐家人嘅傷口撒鹽；亦有人話姐弟只有一個媽媽，就係徐熙媛。不過都有小部分人認同汪小菲嘅行為，仲讚馬筱梅對姐弟好用心。

事實上馬筱梅近期是非纏身，前夫指佢婚內出軌，仲大爆馬筱梅帶其他男人返屋企小聚期間，因為「叫床聲」太大而遭鄰居投訴。雖然汪小菲同張蘭都出面力撐馬筱梅，表示唔介意佢嘅過去，亦強調17號嘅婚禮會照常舉行，不過外界仍然質疑汪小菲係刻意營造馬筱梅好媽媽嘅形象，希望可以幫佢洗白。