頭像遭冒用攻擊舊愛鄧紫棋 林宥嘉親回覆黑粉引發熱議

鄧紫棋 近日忙於喺內地舉行巡迴演唱會，盛傳佢已經入紙申請啟德主場館檔期，計劃8月份舉行一連10場演唱會，如果成事將會成為喺啟德開騷嘅女歌手第一人。不過近日阿GEM再遭黑粉攻擊，甚至連分手11年嘅前男友林宥嘉都捲入風波。

日前有人冒用林宥嘉頭像，喺微博留言批評阿GEM，指「鄧紫棋已經江郎才盡，出道以來沒有出什麼好作品，唯一能聽的一首歌都是被林有嘉拋棄以後寫的《泡沫》。作品沒有，演唱會也開始抄襲，抄襲就算了，還是一如既往的low配版。這也適合鄧紫棋和他粉絲的定位。」

估唔到呢個Post竟然釣出Yoga本人親自回應：「朋友，不知道為什麼你要頂著我的頭像說這些話，請不要這麼做。希望你能原諒、能被治癒、能快樂。」不過Yoga呢個舉動，就意外引起更多討論。

唔少阿GEM歌迷質疑Yoga嘅動機，覺得佢大動作回覆，反而令黑帖傳播得更快，亦有人覺得Yoga係為自己即將推出嘅新碟做宣傳。而Yoga嘅粉絲同樣擔心偶像惹來無妄之災，希望唔好理會黑粉，遠離是非。

回顧阿GEM同Yoga嘅戀情，二人2012年於金曲獎紅地氈拖手高調公開戀情，不過2014年宣告分手。阿GEM之後係事業方面大放異彩，有傳佢其中一首hit爆歌《泡沫》，靈感就係來自同Yoga嘅一段情。至於Yoga就同當年被指係小三嘅丁文琪結婚，而家二人育有一對仔女，一家四口非常幸福。