中年好聲音3丨夥拍張與辰劉洋憑歌答謝支持 黃博期望發展歌唱事業推出新歌

《中年好聲音3登峯之戰》三甲 黃博 張與辰 同 劉洋 現身「王者謝票會」，親自以歌聲答謝粉絲過去9個月嘅支持。

咁值得見證嘅時刻，粉絲一早就到嚟霸位，令會場塞滿人非常熱鬧。作為終極王者嘅黃博，比賽以嚟收穫唔少粉絲，老公峰哥嘅無限量支持亦令佢好感動。決賽當晚得知太太奪冠興奮跪地，峰哥話自己太開心而腳軟，黃博仲話自己每次唱歌，老公都比自己更激動。又希望未來有機會繼續發展歌唱事業，若果能夠擁有自己嘅歌為大家演出，咁就非常完美喇。

經已決定留港發展嘅與辰獲媽咪到場支持，佢透露已經有一連串嘅工作大計，包括推出個人嘅廣東歌同埋開演唱會，屆時會香港同馬來西亞兩邊走。

而劉洋決賽夜嘅唱功獲一致讚好，佢可愛嘅舞步亦成熱話，校長譚詠麟形容劉洋當晚嘅表現，好似騎住殺人鯨打海戰咁。賽後校長更請劉洋食飯慶祝，能夠獲咁多人喜愛，劉洋自覺非常感恩。佢又覺得七強選手都冇分第一、第二，大家都係冠軍，因為都付出自己真心同努力去唱。佢都有計劃多啲來港，希望推出新歌同翻唱經典金曲。

而多位「中聲」師兄師姊顏志恒、羅啟豪同陳芊芸都有現身分享喜悅，見到一班師弟妹發揮得咁出色，佢哋都覺得好感動，仲話好想參加《中年好聲音4》。至於當晚嘉賓評審羅志祥得悉黃博奪冠時被拍下「O」嘴畫面，海兒就幫小豬澄清，佢話小豬唔相信賽果可以咁快一次過公布出嚟。

《中年好聲音4》已經接受報名