樂宜捲入蔚雨芯醫美投資騙案 反駁「別有用心」論只盼取回公道

藝人 蔚雨芯 涉詐騙股東投資醫學美容中心及挪用公款，被廉政公署起訴盜竊罪、欺詐罪及一項企圖欺詐罪共三項罪名，日前喺東區裁判法院首次提訊，案件押後至6月30號再訊，被告獲准以2萬元保釋，期間不得騷擾及接觸控方證人。

庭上陳述案件時，提及原名廖樂宜嘅藝人樂宜，就係2022年被偷竊投資款項嘅苦主。樂宜喺案件公開後首度現身活動，並親自回應，佢話現階段已經唔係佢可以主導去控制件事，因為當初佢想取回公道，但現時已經係廉政公署去執法。

對於蔚雨芯喺庭外指有人別有用心，樂宜聞言就反問兩年前係邊個別有用心，佢強調自己只想取回公道及屬於自己嘅嘢，加上當初經營呢盤生意出現問題之後，對佢嘅聲譽或做生意嘅手法都受影響，因為當初公眾都唔了解整件事。

樂宜覺得經過這次事件，令佢上咗一課，雖然用咗金錢、時間同心機，但對於自己首次做生意嚟講，呢一課係大嘅，但而家佢覺得自己可以從新出發，繼續經營生意之路。