音樂人陳杰西九開騷邀容祖兒上台互動 大騷音樂才華及分享個人故事觸動觀眾

獨立歌手兼音樂人陳杰Chris Polanco日前喺戲曲中心舉行一連兩晚音樂會，吸引多位藝人現身撐場支持，包括容祖兒Joey、向海嵐Anne、康子妮Lily 、何秉舜、恭碩良Jun、李樂詩Joyce、布志綸Alan、林德信Alex 等。演出期間Joey除咗得到陳杰主動同佢握手外，又被對方邀上台一齊互動，見Joey同陳杰坐台上十分興奮。

音樂會上陳杰以西班牙文、英文、以及廣東歌曲糅合劇場元素演出，佢喺頭場已為觀眾送上驚喜，大騷精湛歌藝及樂器演奏才華以及喜劇細胞，當中亦不乏感人真摯嘅分享，講述自己嘅音樂之旅，令現場觀眾感動落淚。陳杰嘅熱情與歡樂富感染力，聽眾沉浸喺音樂之中，享受咗一個笑中有淚、 觸動心靈嘅精彩晚上。

親身到場觀賞兩晚音樂會演出嘅西九表演藝術行政總監 譚兆民Paul 大讚陳杰嘅精彩演出，更於音樂會完結後，當場邀請陳杰為西九更大規模的舞台作未來表演計劃。