趙浚承獲明星足球隊拍片賀歸隊 劉洋 李金凱興奮入隊做新成員

歌唱節目《中年好聲音3》賽事雖然告一段落，不過中3生嘅友誼就冇因為比賽完結而結束，仍然感情深厚！

作為明星足球隊成員嘅趙浚承，先前因為忙於投入比賽及拍攝而少參與球隊活動，如今賽事完結，佢嘅一眾隊友包括黃日華、陳榮峻等，就好有心一齊拎住寫有「浚承」嘅燈牌拍片歡迎浚承終於回歸球隊，仲話：「無論場內場外，我哋都會支持你！」令浚承相當興奮同感動。

不過呢次浚承就唔係獨自歸隊，而係將中3戰友劉洋同李金凱都帶埋嚟介紹畀大家認識，著上波衫嘅劉洋同金凱興奮跑入場前同大家打招呼，大家亦以熱烈歡呼聲歡迎佢哋呀。

經過校長譚詠麟試完波後，就宣布金凱同劉洋兩位正式成為香港明星足球隊嘅成員，校長仲話既然浚承、金凱同劉洋都係《中年好聲音3》嘅一員，咁就不如唱首歌送畀一班香港明星足球隊嘅隊友，於是大家就喺校長嘅帶領下一眾唱《朋友》喇。