Dear Jane成軍廿年紅館騷圓滿落幕 主唱Tim囝囝台下表演成焦點

Dear Jane入行20周年嘅四場紅館演唱會日前圓滿落幕，無論係《哪裡只得我共你》、《銀河修理員》定係《二十年後的歌》，每首歌都令紅館如同萬人K房，歌迷從頭唱到尾。

而主唱Tim嘅太太楊洛婷（Rabeea）以及一對仔女就喺尾場現身捧場，Tim亦為16號生日嘅太太提早送上驚喜，同全場歌迷一齊唱生日歌之餘，亦自彈自唱結婚時為太太所寫嘅《Angel in White》。阿Tim事後表示，當年結婚唱呢首歌時表現甩碌，所以呢次要再唱多次，Rabeea都好識大叫「多謝老公」，而二人喺大家起哄下亦甜蜜錫錫，非常閃！
 
尾場Serrini、魏浚笙、 Tyson Yoshi等藝人亦係演唱會座上客，Tyson同未婚妻Christy更被Kiss cam捕捉到，大方錫錫嘅二人完全搶曬Dear Jane風頭。而Tim嘅囝囝Tristan就拎住小結他喺台下跟住爸爸瘋狂彈奏，非常搶鏡。阿Tim大讚囝囝表現，仲話Tristan最勁係冇學過，以後自己要學返囝囝啲台風先得。不過Rabeea就話Tristan就被老師投訴上課唔專心，令Dear Jane其他成員笑言Tristan唔好學爸爸同叔叔揀行音樂路。
 
Dear Jane喺尾場唱到欲罷不能，更加入Encore環節唱多3首歌，令歌迷亦出盡全出力大合唱，場面令一眾成員感動入骨，更一度眼濕濕。