杜如風拍解風東京2賀50歲牛一 無懼地震預言繼續瘋狂shopping

正在東京拍攝《解風東京2》嘅杜如風，16號迎來佢嘅50歲生日，雖然人在異地，不過就有製作團隊幫佢搞慶祝，唔止有蛋糕，仲有生日彩帶，氣氛100分。

雖然話年齡係女人嘅秘密，不過杜如風就好大方對鏡頭比出「5」字手勢，仲寫到「老娘今日50大壽！多謝各位團友俾我嘅surprise！老啦，係時候退休啦！」不過就有好多網民留言話最鍾意睇佢主持節目，叫佢千祈唔好咁早退休。

杜如風嘅「解風」系列第二次去到東京，出發前有好多人提醒佢小心地震，不過杜如風就話唔驚得咁多，佢話東京千變萬化，永遠都有新嘢可以拍，由佢嘅IG可以睇得出，佢呢幾日喺東京嘅拍攝順利又開心。出名鍾意shopping嘅佢，又撞正生日，當然要買返夠本啦，佢仲豪氣話，自己shopping嘅budget從來都冇上限，真係聽到都羨慕呀！