群星匯聚啟德為公益大匯演錄影 中聲師兄師姐期待與師弟妹合作

鍾柔美、冼靖峰、黃奕斌、譚俊彥、袁偉豪、姚子羚以及《中年好聲音》歌手李佳、古淖文、羅啟豪、顏米羔、黃劍文以及新鮮出爐嘅中聲3冠軍黃博等一眾藝人，呢集齊啟德為《保境安民為公益綜藝大匯演》錄影。
 
隨中聲Family越嚟越人強馬壯，作為師兄師姐嘅中1、中2生都好想同中3生有合作機會。古淖文就話其實有好多位選手都係自己好想合作嘅，但真係要揀一個嘅話，佢就會揀劉洋；黃劍文同陳芷盈相識多時，不過甚少一齊演出嘅機會，所以佢都好希望可以同芷盈合作；至於佳佳就睇中有唱開Jazz同R&B嘅張與辰，大讚對方風格不同。另一位亦係佳佳心水人選嘅就係占士丁丁，因為二人都係相識多時，但未試過合作；顏米羔就最想同李金凱合作，事關佢欣賞金凱唱歌方式。
 
黃博之前同羅啟豪合唱《囚鳥》，震憾全場，合作影片更喺影音平台超過百萬點擊。二人呢次再有機會合唱，心情都輕鬆唔少！而越戰越有自信嘅黃博，仲話已經報名參加內地歌唱節目《我是歌手2025》，因為自己喺中聲3得到好大勇氣，令佢敢再去嘗試同挑戰。
 
姚子羚早前被爆同雪梨囝囝徐偉棟擦出愛火，呢日佢就甜蜜承認同對方了解中，關係仍然係朋友。子羚指二人因為拍《狀王之王》認識，亦有共同話題同興趣，佢亦形容徐偉棟係一個好男仔，性格可愛，又大讚徐偉棟攝影技術了得，所以自己都搵過對方幫手影相。不過一講到見家長，子羚就好怕羞，但佢就話聽到有傳媒提議自己同前輩一齊拍劇，自己都覺得呢個提議好好。
 
演得又唱得嘅譚俊彥同袁偉豪呢日帶埋結他上場表演，啱啱喺廣州開完演唱會嘅阿Ben，就因為彈結他時睇落面容扭曲，而被網民笑佢有張「Guitar face」，但亦有網民驚訝佢喺音樂方面咁有才華。對於網民毁譽參半嘅評價，阿Ben就話當時自己非常投入演出，當自己睇返條片時先知自己個樣係咁，亦喺呢刻真正做到「成個人入咗去」，享受演奏。
 
冼靖峰、黃奕斌、林智樂三位聲夢唱將即將會合體喺內地開Show，冼靖峰就話好期待開騷，亦希望未來可以將呢個三人Tour帶返嚟香港同本地歌迷見面。