婚前最後一騷丨Tyson Yoshi唔會禁止飛Bra傳統 自喻反派內疚頭場撞未婚妻生日

獨立歌手Tyson Yoshi 將首度登上全新場地啟德體藝館，於7月5及6日舉行演唱會，Tyson直言從來冇諗過自己有機會可以登上啟德舞台，仲話2019年喺油塘TTN舉行自己首個演唱會時，見到啲飛成功售罄已覺得係人生巔峰，但世事如棋，估唔到六年後竟然可以喺啟德體藝館開騷。

今次演唱會以「The Villain（反派 / 壞人）」為主題，Tyson話呢個演唱會概念，同佢最愛嘅動漫有關：「我認為自己是娛樂圈的異類，如果將藝人比喻為漫畫角色，其他人可能像《火影忍者》或《海賊王》般的英雄角色，而我更像《死亡筆記》，所以持劍騎馬的確有『戰爭』的意味，但要殺的並非其他人，而是自己！」

Tyson指三年前自己曾舉辦過一次演唱會，當時大眾唔算太認識佢，所以佢就想透過說話嚟表達自己唔同嘅想法，但而家呢個演唱會，佢就想呈現自己呢幾年嘅成長，少說話多表演，叮囑自己要「收嗲」，Tyson表示：「這三年來，我經常與腦海中的『舊我』對話，每一次都會從中獲得新見解，並將『舊我』埋葬，成就全新的自己。所以，這場戰爭其實是我與自己之間的較量。」

一直以來拒簽任何公司，以獨立歌手身份行走娛樂圈，Tyson話呢個係自己最「反派」嘅一面，佢指反派路上只有自己一個，而其他「老Best」如張敬軒、Jeffrey魏浚笙、林家謙同Serrini等都係「好人」。唔少人都好奇Tyson嘅老Best們會唔會成為演唱會嘉賓，不過Tyson就提醒大家，演唱會嘅主角係佢，叫大家唔好太執著於嘉賓喇。

7月5號演唱會頭場撞正 未婚妻Christy嘅正日生日，但由於對方要提早飛去歐洲準備佢哋嘅婚禮，所以可以只可以睇半場演唱會，就要趕去機場搭飛機，Tyson坦言唔可以陪對方過生日有啲內疚，但公認係「愛妻號」嘅佢就話早有準備，當晚除咗會率全場大合唱生日歌外，更放出愛的宣言：「往後每年的生日也會陪她過，而且Christy也明白我要好好完成這次演唱會，才能全心全力投入婚禮呢！」

有留意開Tyson嘅都知，佢嘅fans相當奔放，每次開騷都會有fans飛Bra上台，雖然即將成為人夫，但Tyson就話唔會禁止fans呢個傳統行為，並承諾演唱會上一定會大方騷肌：「騷肌是基本吧！若然不騷的話，我擔心大家會𠝹櫈及嗌回水，雖然我不怕得罪人，但驚群情洶湧難以招架，不如從善如流啦，我先行『自首』便對了，哈哈！」身為「自律之鬼」演唱會門票將於6月3日早上10點正式公開發售，而Tyson最近亦已進入閉關狀態，謝絕出街吃飯，為佢嘅「最強Body」可以喺演唱會上再創高峯呀！