郭富城到訪小學與師生大合唱 回應三度做爸爸傳聞疑默認

出生喺Alpha世代嘅小學生，到式知唔知邊個係舞台王者 郭富城 呢？ 呢日城城到一間小學出席一個「與名人暢談」嘅活動，就不知幾受小學生歡迎喇。城城更上台分享自己逾30年演藝之路。

難得見到城城，小朋友都袋定好多問題問吓佢，好似有小記者就叫城城分享自己嘅奮鬥故事，亦有小記者問城城想點樣過父親節，雖然時間有限，但係城城都盡量希望比所有小記者發問，真係好貼心呀。

城城嘅出現相信勾起在場唔少老師同家長嘅青春回憶，尤其佢首金曲《強》，真係隔咗幾多年聽都咁有感染力。全場師生亦同城城一齊大合唱，令成個校園都充滿歡樂同活力，真係好似開小型演唱會咁有氣氛。

城城雖然係兩個小朋友嘅爸爸，但係佢就話自己絕對唔係怪獸家長，希望兩個女可以自由發展，最重要係小朋友開心。至於講到最近有傳佢嘅太太方媛再度有喜，呢日城城就未有正面回應，只係話多謝網上嘅朋友關心，佢話小朋友係上天恩𧶽嘅禮物，係好感恩嘅事，但就唔想回應太多，至於城城係咪再做爸爸，咁相信好快時間可以比到大家答案呀。