《中年好聲音3紅白大戰》即將上演 3屆唱將經典大戰同場競技

《中年好聲音3》雖然比賽完結，不過節目依然陸續有來，《中年好聲音3紅白大戰》呢日就正式錄影，成員分為紅白兩組繼續以歌聲決戰，而嚟緊仲會有《中年好聲音321經典大戰》上演，真係可以話係歌聲不斷喇。

呢日 支嚳儀 同 譚輝智 就分別擔任紅白兩隊嘅隊長，不過未開咪之前，兩位隊長就率先鬥嘴，希望先聲奪人咁喎。FC就估計3位女評審會較為偏向男士組成嘅白隊，不過支支就覺得靚女勝算較大，仲話大家練舞練到變「Back Pain」咁話，相信大型舞蹈會帶領紅隊勝出。

黃博 同 陳芷盈 就指會挑戰高難度演出，當中歌曲比賽都唔夠膽揀，加上有大量舞步，仲話非常有信心9位女將會順利勝出呀。

另外《中年好聲音321經典大戰》集合全體唱將，戰況唔使講就梗係會更加激烈喇，而一眾《中聲》首屆成員，就話呢日到錄影廠感覺好似舊生返校咁，成為大前輩之餘，仲難得有機會集合，仲話要好好聚一聚呀。

《中聲2》嘅成員就話佢哋最好活力，將以一首大家估唔到嘅歌曲出戰，German仲話非常歡迎後輩加入，最緊要大家玩得開心，唱歌高興就乜都夠咁話喇。

呢晚亦極難得3屆《中聲》王者同台，不過黃博就似乎有少少緊張咁，吉吉仲提議開個Groupy交流，German就話要多啲約新手黃博食飯等佢快啲融入喇。

呢日大家又為37歲嘅 林思彤 慶祝生日，姊妹仲High爆為佢當眾唱生日歌呀。

羅逸軒 參賽時以俾嫲嫲見到自己上電視為目標，可惜老人家早前離世，呢日羅逸軒就話已經無憾喇。