《痞子》重組為朱敏瀚慶生 陳瀅新舊緋聞男友同場

朱敏瀚 啱啱忙完主演嘅劇集《虛擬情人》宣傳，5月23號踏入33歲生日嘅佢，就被老Best《痞子》三人組提早同佢慶祝生日。 陳瀅 同 JW王灝兒 都喺社交平台嘅限時動態分享飯局相，雖然未有合照，但係 陳瀅 就分享朱仔為生日蛋榚吹蠟燭相。

而JW分享嘅一張焗飯相，就標註咗陳瀅、朱仔、 周嘉洛 嘅IG帳號，透露痞子四人組又再合體。當中仲另外仲包含一位曾經同陳瀅傳緋聞嘅男友人Howie，陳瀅喺2019年曾以「老公」稱呼對方而傳出緋聞，當時佢仲澄清呢位佢係相識多年嘅要好朋友。

而Howie同唔少圈中人亦相當熟絡，曾經相約周嘉洛健身，挑戰倒立。 相信Howie已從陳瀅老Best變成陳瀅新任緋聞男友周嘉洛嘅老Best，早已融入「女友」陳瀅嘅朋友圈子喇。