鄭秀文火辣貼身舞熱血沸騰 六尺型男蔡浩然曾達二百磅

鄭秀文澳門演唱會已經完成咗六場，每場佢都邀請唔同嘉賓畀觀眾驚喜，不過當中佢跟高大型男嘅疑似咀嘴、火辣貼身舞就睇得觀眾熱血沸騰。呢位身高超過六尺嘅舞者叫 Scott 蔡浩然，模特兒出身嘅佢近年轉型演藝發展，曾參演電影《失衡空間2之闇室》同劇集《叠影狙擊》，身手敏捷嘅佢亦喺演出中有打鬥戲份。

唔好睇 Scott 依家係健碩型男，昔日佢曾經係體重高達二百磅嘅肥仔，佢話當時經歷過唔少唔開心嘅經歷，直至升上中六時，佢決心減肥，仲同幾位好朋友組成「減肥復仇者聯盟」，一齊搵合適嘅運動減肥，最後選擇咗跳舞，升上大學後仲加入 Danso，從此展開 Scott 舞者之路。

今次有機會喺 Sammi 澳門站演唱會上跳雙人舞，仲有大量親密互動，包括身貼身擁抱、撫摸、將 Sammi 抱入懷轉圈、加上兩度面貼面疑似激嘴的動作，而最引人遐想，就係 Scott 將面部緊貼著 Sammi 胸口。Scott 話最初有啲顧忌：「一開始會尷尬，驚太多 Body Touch 佢會唔會唔鍾意，又驚太多『肉搏』會影響到Sammi 唱歌，但估唔到佢一次比一次放，到而家好似埋身肉搏咁，feel 到佢完全豁出去，所以我都豁出去。全靠 Sammi 畀好多信任我，佢畀到愈多，我就畀到愈多。」