陳敏兒憶黃日華初出道受白眼 敬佩拍檔靠毅力克服講對白困難

80年代五虎將之一嘅黃日華，多年嚟飾演過唔少經典角色，而當年令佢一炮而紅嘅代表作就係《射鵰英雄傳》嘅郭靖一角。華哥昔日嘅拍檔陳敏兒，近日就接受網上頻道《威哥會館》訪問，大讚華哥付出嘅堅毅同勤力，令敏兒真心敬佩。敏兒話華哥當年講台詞唔叻，經常話自己係黐脷筋，一開口就夾着脷。由於華哥當時不停NG，令旁邊嘅人質疑佢話「嘩！乜你咁㗎，講句嘢都講唔到！」令華哥面對好大壓力。

之後華哥就做手術剪脷筋，但仍然未解決到講對白嘅問題，敏兒話最後華哥係靠意志同毅力，即使工作再忙都堅持不斷背對白，最後克服口齒不清嘅問題，敏兒話：「一個藝員嘅成功，肯定係花咗大家想像唔到嘅努力，佢成功係努力爭取返嚟，唔係靠個樣打出頭。」

敏兒又話再次見到華哥嘅努力，就係當年對方接拍《射鵰英雄傳》時應付打戲，因為華哥當時無功夫根底，只係靠武指臨時度招數去教授，華哥就即學即打，有時打錯方向就被武指同拍檔鬧。華哥曾講過自己默默承受，返到屋企喊。由於自覺天資唔夠，華哥就靠勤力練習，到最後打得似模似樣，成為一代「郭靖」嘅典範。