電影泉攻略｜袁詠儀克服暈船浪完成外景 黃潔琪扮嬌嗲失敗頻甩咀丨EP156

王鎮泉 Jeoffrey 每星期為觀眾提供最熱辣電影資訊，中外猛片專訪花絮上映時間全部集齊，「電影泉攻略」個個星期陪你睇新戲。

今集《影人Talk》邀請到新戲《OMG！阿媽有喜》嘅主演 袁詠儀 同 黃潔琪Miko 分享拍攝點滴。靚靚喺戲中飾演50幾歲意外有喜嘅媽媽，要去面對新生命來臨，同仔女嘅相處問題。Miko戲中飾演家中嘅阿妹，亦係一位百變直播網紅，佢話同靚靚對戲時好順暢，但一埋位就不停甩咀，因為導演要佢扮嗲聲嘅狼叫，但一直達唔到要求，最後要由導演親身示範。靚靚指魔童細嘅時候，都會用較嬌嘅聲線去講睡前故事，佢笑言如果用平日聲線去講故事，魔童應該會變惡夢。

講到戲中有一幕坐快艇去醫院畫面，靚靚當時出現暈船浪，好彩上到船後有好多嘢要兼顧，導演又承諾用最短時間拍完，所以最後都順利完成。靚靚話當初曾經講過會暈船浪而唔肯上船拍，當時佢以為導演會取消呢場戲，結果係冇人理佢。Miko話最深印象係拍完嗰場戲之後，就殺青成部戲，大家就去咗食榴槤放題慶功。

今個星期新片速遞：

《單思的世界》
喺東京嘅角落，美咲、優花同櫻喺一間古宅裏面過住無憂生活，各自上班上堂兼職，夜晚一定會聚埋一齊共享美食同趣事，沉浸喺幸福快樂嘅三重泡沫中。直至有一日，美咲喺巴士上偶遇到佢，十二年嘅無見，勾起一段心跳回憶，而尋人大冒險亦隨即展開。

《職業特工隊：最終清算》
承接上集劇情，湯告魯斯飾演嘅伊頓（湯告魯斯飾）同隊友捲入歷來最危險嘅任務。超級人工智能系統「個體」，即將引爆全球核子巨災，將世界推向滅絕邊緣。伊頓幾經艱苦，雖然成功奪得關鍵鑰匙，但要消滅「個體」，完成呢場挽回全人類命運嘅終極任務，仍然需要同隊友衝破重重難關。佢唔單止要迎接前所未有嘅考驗，仲要面對過去嘅種種恩怨。每個抉擇都關乎信念與命運，等待伊頓自投羅網嘅，究竟會係點樣嘅一個終局呢？

至於今個星期嘅票房戰況，直至5月21號中午，第三位《水餃皇后》、第二位《雷霆特攻隊*》、第一位《死神來了：血脈》。