古天樂查案捲入連環兇殺事件 太太周秀娜陷入出軌疑雲

古天樂同周秀娜喺犯罪懸疑電影《私家偵探》入面飾演夫婦，身為偵探嘅古仔查探一樁離奇婚外情疑案時，意外捲入駭人嘅連環兇殺！古仔一改以往電影中硬朗形象，化身為冷面、深藏秘密嘅私家偵探，形象滄桑冷峻，現身國際偵探社四處追查線索，仲將「我係私家偵探，我嘅工作就係發掘秘密」掛喺口邊。

伴隨古仔逐步揭開謎團，係一幕幕充滿張力嘅場景，楊偲泳性感游走夜店，氣氛曖昧；女角色疑似喺車廂偷情，繼而發生慘絕人寰嘅勒殺命案。古仔以偵探身份介入調查，試圖查明太太周秀娜嘅婚外情，卻喺追尋真相過程中，捲入一場殺機四伏嘅謀殺案件。案中有案，層層推進，佢仲同劉冠廷飾演嘅警探展開鬥智鬥勇生死較量，怒言：「如果搞我屋企人，我一定殺咗佢。」而參演嘅演員仲包括黃浩然、張兆輝、黃詩棋、培永、蔡祥宇，仲有關德輝友情客串。