張學友下月東莞演出撞期高考 家長投訴怕晚演出礙早考試

近日正於重慶繼續進行歷時已近兩年巡迴演唱會嘅 張學友 ，自演出而來新聞不斷，好似曾先後因身體問題而需停演，又曾跌倒而惹起恐慌等。而下月即將重返廣東演出嘅學友，原定下月6至8日將於東莞表演3場，不過近日就傳出，因7號同8號都係內地高中嘅高考大日子，而演出場地東莞銀行籃球中心又同其中一個試場距離甚近，所以引起部份家長關注，仲向相關單位投訴希望演出改期，此事更成為內地社交平台熱搜話題。

據內地傳媒報道，當地相關部門已召開過多次會議，亦將執行保障措施確保唔會對考生造成影響。而家長主要擔心受影響嘅東莞六中考場，經現場測試後，相關部門認為演唱會場地同試場之間直線距離有約1.6公里，現場噪音唔會帶來影響。

政府方面人員又指出，演唱會約晚上7點半開始，會持續2個半小時。而兩日高考開始時間係上午9點，結束時間則為下晝5點，時間段上未有重疊對考生未有影響。場地周邊亦無民居，表演亦於室內進行，結合以往情況進行分析同現場測量後，認為演唱會產生嘅最大音量都未會對該考生備考有影響。目前亦未接到演唱會延期嘅消息。