涂家堯鄧顥懷為慈善獻唱推跨代共融 蘇志威大女炮製愛心曲奇送甜蜜

涂家堯 鄧顥懷（Roy）、蘇志威大女 Yumi  鍾舒漫 黎美言 等現身一個慈善音樂會，為推動跨代共融出力。同屬《中年好聲音》出身嘅家堯同阿Roy都好開心可以參與呢個有意義嘅活動，唔只可以唱歌仲可以做埋善事。至於阿Roy就覺得呢個活動主題好值得推廣，加上自己最近去咗澳洲探望媽媽，佢都覺得要抽多啲時間陪家人。

最近有報道指家堯想做音樂老師教唱歌，呢日佢就指一直以來都有為一啲音樂比賽擔任評判，部份參賽者亦想搵自己學唱歌，所以有考慮要唔要真係做呢件事。而阿Roy最近就為出新歌做準備，歌曲以社會議題、社會服務做主題，一首會由張佳添創作，另一首就由朋友作曲，阿Roy親自填詞。阿Roy仲話填詞係一件好難嘅事，但只有自己填先可以講得出心聲。

而作為甜藝導師嘅Yumi╴就親手炮製200幾塊造型可愛嘅愛心曲奇向小朋友同老人家派發，希望將呢份喜悅同甜蜜傳送俾大家。下個月就係父親節喇，Yumi都話考慮為爸爸籌備節日驚喜，可能會設計蛋糕送俾爸爸。