盧靖姍靠做瑜伽練習呼吸解壓 李宇春開騷前要獨處調整狀態

內地男星韓庚日前同太太盧靖姍，喺社交平台分享一張由囡囡拎住胎兒超聲波相嘅照片，宣布即將迎接二胎喜訊。即將再為人母嘅盧靖姍，呢日就同金靖、李宇春一齊喺北京出席一個大型瑜伽活動，呢次亦係佢宣布懷有二胎後首度現身公開場合。

雖然身懷六甲嘅盧靖姍腹部微隆，但作為動作演員嘅佢平日鍛鍊有素，做起瑜伽動作仍然靈活。佢仲帶領大家喺草地做正念呼吸，亦分享平常都會做瑜伽減壓。盧靖姍仲話做瑜伽係一種好解壓嘅活動，自己上年做舞台劇時，情緒每一日都崩潰，而做瑜伽練習呼吸可以令自己重新充電，找得平衡。

李宇春亦有同導師示範做瑜伽，春春仲話自己每次上台前都會有少少緊張，所以開騷前都會請工作人員離開休息室，令自己可以同自己交流、放鬆，調整到最好狀態。而喺一場高強度演唱會結束後，亦需要時間令自己喺一個精神世界入面令身心得以放鬆。